飛腳踏實「由」細做起
2013/03/03
文:蘇豪
降班換帥不再瘋狂
日乙今午強勢回歸，最矚目梗係名牌球隊大阪飛腳啦，呢隊前亞洲冠軍淪落到要打次級聯賽，死因係唔識防守，新帥長谷川健太接手後第一時間重整後防，首仗主場對京都不死鳥穩中求勝，預期入波唔多，大細中位數改成3.5球，捧細盤！
（周日下午3時開賽）
長谷川健太重整防線
大阪飛腳上季喺日職轟入67球，數字冠絕日職，衰在後防曳到震，全季勁失65球，僅好過失咗88球嘅包尾大幡札幌岡薩多！飛腳後防人腳唔差，問題源頭係上任教頭松波正信太瘋狂，淨係掛住攻，完全忽略防守。佢哋新季改由前清水心跳長谷川健太領軍，佢上任後對症下藥，日日捉實後防重心今野泰幸同岩下敬輔狂操，決心執好條防線，戰術上亦有作出調整，唔會再有前冇後。
再望一望飛腳中前場人腳，梗係犀飛利啦，中場由日本國家隊主力遠藤保仁負責校炮，前面就有巴西星級射手李安度蒙迪拉擔大旗，加埋去過西甲馬略卡搵食嘅家長昭博幫手，呢個進攻鐵三角星味十足，淨計個陣容，打日職隨時都係爭標分子，踢日乙真係大超班。不過，日乙比賽風格同日職截然不同，飛腳仲要多少時間適應，今場贏面確係較高，但欠缺大勝本錢。
不死鳥作客以穩為先
京都不死鳥係日乙實力分子，上季拎到第三，最後喺升班附加賽出局，今季由川崎前鋒引入進攻中場山瀨功治，仲搵咗清水心跳守將姜成浩幫手，矢志捲土重來。不過，全世界都知飛腳打日乙惡到暈，不死鳥唔會咁傻同佢哋鬥攻，今次會專心打突擊，避免開壞個頭，相信入波唔會多，博細啦！