Football

國足爆迎泰國吼「半細」

2013/06/15

鄭智孫祥休戰 副選頂檔

今晚國足又出場,於合肥鬥泰國備受莊家睇好,主W熱到得1.11倍,只因對手派出青年軍應戰!但中國鬥完荷蘭攰到爆,主力鄭智、孫祥已經離隊,而且幾名FC廣州大將亦缺陣,大勝有難度。泰國班o靚仔體力充沛下可頂到半場,捧半場細!

(中央5台周六晚7時35分直播)

中國上仗對荷蘭脆脆哋輸2蛋,表現唔算太曳,球隊難得鬥世界一級對手,個個都踢得好搏命,完場後個個攰到爆。事實上,國足由本月6號開始,已先後不敵烏茲別克同荷蘭,連埋今仗10日要打3場國際熱身賽,一班主力體力已完全透支,除鄭智同孫祥已經返咗屋企外,主教練甘馬曹今輪仲會畀另外6名FC廣州球員休息,王永珀等副選會被委以重任。

上仗鬥荷蘭,甘帥於換人方面擺晒烏龍,欲派劉健後備出場,但原來名單上竟然冇佢個名,賽後備受傳媒抨擊。另外,有傳納比有意接手國足,甘馬曹幾面受敵,加上已2連敗,今次於合肥出戰,點都想贏番場。不過國足出晒名攻力麻麻,今戰仲要出副選,上半場未必入到波。

泰國青年軍好氣好力

泰國方面,今次僅派青年軍出戰,呢班後生仔難得有機會見大場面,必定肯走肯搏,打守勢波未必輸蝕畀國足。於好氣好力下,預料半場冇乜交收,捧半場細。

波經所提供之資訊概以較新版本為準,並已力求精確可靠,但不保證絕對無誤。
資料只供參考用途,如有錯漏而導致閣下蒙受損失,本公司概不負責。