Football

荷蘭比利時兄弟大駁火

2016/11/09

洛賓回歸挑戰英超群星

新一輪國際賽檔期展開,今晚有1場好戲碼熱身賽,荷蘭主場迎戰比利時。「橙衣兵團」近年成績大幅下滑,遠比鄰國「細佬」比利時遜色,但爛船始終有三斤釘,特別係今次有洛賓歸隊,攻力即時大升呢。「歐洲紅魔」比利時有夏薩特、奇雲迪布尼、盧卡古等頂級進攻好手助陣,加上一向踢熱身賽認真,入波機會高,首選入球大(2.5球)。

(TVB 302周四凌晨3時45分直播)

荷蘭同比利時曾經合辦2000年歐國盃,當年「橙衣兵團」仲好風光,打入4強,比利時則分組賽出局。不過時移世易,荷蘭近兩年青黃不接,搞到連今夏歐國盃都冇份踢,陣中仲有睇頭球星,得番洛賓。呢位32歲老將季初養傷一排後,仍然保持高水準,頻頻為拜仁慕尼黑建功。荷蘭有番呢位老大哥領軍,其他隊友踢起上來都比較有信心。「橙衣兵團」今仗主場出擊,梗係想教訓「細佬」比利時,攞番個彩,應會採取主動。

下仗遇弱旅唔使留力

比利時人才輩出,整體實力已凌駕荷蘭,近3仗比賽全勝入13球,夏薩特、奇雲迪布尼、盧卡古都係英超當紅猛將,夏薩特今季重拾勇態,已轟入7個聯賽入球,幫車路士大翻身。值得留意,前鋒恩歷克卡拉斯高今季喺西甲都有突出表現,近3場聯賽為馬體會攻入5球,恐怕荷蘭抵擋唔住呢條夢幻鋒線。比利時近5場熱身賽作客,取得4勝1負,去到鄰國荷蘭比賽,更加未驚過。

由於荷蘭下場世界盃外圍賽對手只係魚腩盧森堡,而比利時亦只係對愛沙尼亞,冇乜後顧之憂,今場唔怕盡情發揮,實多波入,捧入球大(2.5球)。

波經所提供之資訊概以較新版本為準,並已力求精確可靠,但不保證絕對無誤。
資料只供參考用途,如有錯漏而導致閣下蒙受損失,本公司概不負責。