高原主場利大主Ｗ過關穩
2017/02/28
新一屆南美球會盃將於明早展開第1圈首回合賽事，上屆決賽前夕，發生空難悲劇，導致巴甲球隊查比高恩斯未能出戰決賽，另1支決賽隊伍國民體育會，自願將冠軍寶座讓予查軍，表現崇高體育精神令人敬佩。雖然呢兩支球隊今年「升呢」轉戰南美自由盃，但南球盃仍然有睇頭，其中2009年冠軍利加大學主場對迪芬沙士砵亭，「利大」最犀利絕招必定係高原主場氣候，近17場南球盃主場，贏咗16場，主勝夠晒穩陣。
（周三早上8時45分開賽，馬會網上文字直播）
厄瓜多爾球隊利加大學曾於2008年捧自由盃，09年再贏南球盃冠軍，盛極一時。雖然「利大」近年喺南美賽事成績欠佳，但主場威力並未削減，事關佢哋所在城市基多，位處海拔9,350尺高原地區，當地空氣稀薄，往往令客軍難適應，尤其係來自「平地」嘅烏拉圭球隊迪芬沙士砵亭，肯定更輸蝕。同埋南球盃球隊普遍實力較弱，亦令「利大」高原優勢更大，近17場南球盃主場取得16勝1負，其中11場冇失波，相信可以擊敗迪芬沙士砵亭。
串奧希金斯讓主卡利大
另1場南球盃首回合，奧希金斯主場對富亞薩阿馬利拉，智利球隊奧希金斯跨季主場6連勝，近3次主場仲轟入10球，有力大炒名不經傳嘅厄瓜多爾球隊富亞薩阿馬利拉。至於哥倫比亞球隊卡利主場鬥巴拉圭球隊路昆奴，雖然卡利近6次主場5勝，但防線主力梅里路受傷，後防有隱憂，寧願捧入球大。