Football

狐狸下盤掃殘兵

2017/08/11 00:00

英超回歸!今晚2:45揭幕Show

抖咗2個半月,英超返嚟喇!今季開鑼戰罕有咁安排喺周五深夜上演,由阿仙奴主場對「狐狸」李斯特城。「兵工廠」剛勇奪社區盾,不過佢哋近年經常出閘脫腳,加埋傷兵同停賽問題要殘陣出擊,面對李斯特城冇着數,讓球盤「狐狸」受讓一球,必捧2.05倍下盤!

(Now 621及LeSports HK應用程式周六凌晨2時45分直播)

阿仙奴近年季前備戰有唔少問題,主力要應付國際賽延遲歸隊年年發生,今季就有阿歷斯山齊士(A山)同梅斯達菲,因為要踢洲際國家盃而錯過所有季前熱身,前者更盛傳離隊添。雲格賽前記招話A山「受傷」抖1至2周,明顯係為轉會鋪路。加埋艾朗藍斯、奧斯爾同梅迪薩卡都因傷上陣成疑,連埋停賽嘅哥斯尼,阿仙奴今仗讓齊車馬炮。

阿仙奴開鑼戰贏波率低

翻查紀錄,阿仙奴近7季聯賽開鑼戰只係贏過1次,贏波率僅達14.2%。今仗雖然有主場之利,但其實「兵工廠」已經連續第6季喺主場開咧,對上兩季分別吞韋斯咸雙蛋,同埋上季3比4輸畀利物浦,加上球迷對領隊雲格嘅不滿仍然持續,主場fans隨時「倒米」多過支持,令球員承受更大壓力。

李斯特城穩守突擊有計

李斯特城今季陣容未見大變動,屢傳離隊嘅靈魂人物馬列斯仍在陣中,連同前季奪冠功臣占美華迪及岡崎慎司,加上引入伊恩拿祖同伊保拉等新血,整體實力有增無減,今仗作客可以踢番佢哋最擅長嘅穩守突擊,有分落袋絕不為奇。