Football

搶踢附加賽背水一戰 國足焗攻做大騷

2017/09/05 00:00

今晚世界盃外圍賽焦點一定係亞洲區第3圈最後一輪分組賽,13億同胞極度關注,A組中國隊作客卡塔爾,到底可唔可以創造奇迹,後來居上奪得附加賽資格呢?國足今場唔止要贏波,仲要寄望烏茲別克同敘利亞一齊輸波,先至有望完成呢個「不可能的任務」。國足背水一戰,焗攻求勝,預料會同卡塔爾合演入球騷,首選中位數2.5球嘅入球大。

(Now Fox Sports Play周二晚11時直播)

國足上仗以1比0力挫烏茲別克,落後烏茲別克同敘利亞3分,要獲得小組第3名參加附加賽,唯一機會係自己今場贏波,加上烏、敘二軍一齊輸,希望最後能夠以較佳得失球,升上「阿三」。國足出線機會看似渺茫,但唔代表絕望,首先對手卡塔爾已經篤定出局,戰意成疑,或可減少國足爭勝阻力。

寄望南韓伊朗贏波幫手

其次,烏茲別克需於主場硬撼南韓,「太極虎」要力爭贏波,確保小組第2位直接出線席位,鬥心一定強,隊內有熱刺前鋒孫興民等猛將助陣,有力擊敗烏軍。至於敘利亞作客鬥伊朗,雖然伊朗已出線,今場唔使搏,但本身實力強橫,加上喺國民面前唔衰得,相信唔會放過敘利亞。因此,烏、敘一齊輸波,並非冇可能。

卡塔爾主場謝幕戰唔會縮

伊朗、南韓間接幫手之下,國足更加要把握時機,自己爭氣贏波,打場逆轉勝。據悉,主帥納比將繼續擺出433陣式,強攻卡塔爾,既要搶3分,亦希望入多幾球,增加淨得球,提升出線機會。卡塔爾已篤定出局,球員冇心理包袱,應該踢得比較放,特別係主場出擊,當然唔想捧蛋,起碼要入番球,有利製造大手交易。