發威炒哥國 馬納當拿上身 勁爆美斯恨死金正恩
昨晨世盃外圍賽南美區賽事，面臨出局嘅阿根廷主場3比0打爆哥倫比亞升上第5位，出局壓力稍為得到紓緩，美斯今仗繼續扮演救世主，賽後更率領隊友向阿根廷傳媒宣戰，霸氣十足。據報北韓領袖金正恩都好恨有個球王，所以開設「美斯工廠」，希望培育北韓美斯稱霸球壇。
阿根廷今仗開波10分鐘就發威，美斯射入靚爆罰球打破僵局，13分鐘後，柏拉圖接應美斯高波近門頂入，證明教練安排佢代替希古恩打正選冇錯。阿根廷去到完場前6分鐘，再由迪馬利亞錦上添花，最終以3球大勝哥倫比亞。數據顯示，阿根廷近12個入球中有10個同美斯有關，包括4個入球同6次助攻。
阿根廷依家暫時身處附加賽位置，原來30年前佢哋都遇過類似嘅困境，阿根廷喺1986年世盃外，同樣幾乎淪落到要踢附加賽，但佢哋喺馬納當拿領軍下，最後1場作客打和秘魯，直接躋身決賽周，有阿根廷媒體認為，今次美斯終於似番馬納當拿，能夠以球王霸氣帶領國家隊逃出困境喎！
向傳媒封嘴 代拿維斯出頭
雖然獲傳媒大讚，不過美斯賽後帶領隊友出席記者會，宣布全體向傳媒封嘴，事關最近有記者報道，指拿維斯因為喺集訓期間食大麻而被棄用，作為隊長嘅美斯就代隊友出頭：「我哋唔會再回答傳媒問題，理由大家都知道。對於拿維斯被污蔑，實在太難令人難受，如果我哋唔作出行動，可能有人會信以為真。」
北韓搞「美斯工廠」造200球王
美斯球場內外盡展大佬風範，向來係超級足球迷嘅北韓領袖金正恩都流晒口水，據報金正恩3年前秘密喺平壤開咗間叫「美斯工廠」嘅足球學校，並且挑選咗200個9至15歲嘅童男童女「入廠」，希望策略性培育出一個「北韓版美斯」！
「美斯工廠」嘅主教練李友日最近表示：「我哋要將年輕人練得比美斯更犀利，依家我哋目標係要稱霸亞洲，喺不久嘅將來仲要統治世界足球！」據報學校入面有6成係男仔，4成係女生，成個計劃由金正恩親自監督，所以會投放大量資源去實現呢個稱霸球壇嘅計劃！