拿尼威脅曼聯 hea到約滿
2012/09/10
C朗葡萄牙師弟拿尼好嘅唔學，學足師兄咁大跳草裙舞，仲話如果曼聯唔畀佢走，佢就會賴死留多兩年，之後可以自由身搵新球會，令紅魔一個仙都分唔到，認真賴皮。
踢爆C朗開心番
早幾日俄超盟主辛尼特曾向曼聯提出，以3,800萬歐元（約3.7億港元）收購拿尼，不過呢位葡國翼鋒獅子開大口，要成13萬鎊（約160萬港元）周薪，嚇到辛尼特走夾唔抖。離隊唔成，拿尼遷怒曼聯，聲大夾惡咁話：「你唔畀我走，好呀，我就hea到合約完為止，回復自由身先走人。」之後熄埋手機扮大牌添，寸到爆。
現時拿尼同曼聯仍有兩年合約，周薪達9萬鎊（約110萬港元），依家仲扭計威脅球隊，以紅魔主帥費格遜咁強硬性格，加上陣中有艾舒利楊格、路爾斯華倫西亞、香川真司可用，絕對雪得起拿尼。而正為葡萄牙備戰世盃外圍賽嘅拿尼，透露C朗冇唔開心，仲話上仗對盧森堡入波後，佢已經笑番晒。