球星閃閃迎聖誕
2012/12/19
聖誕節就快到嘞！歐洲各地球星都齊齊提前慶祝佳節，皇馬全軍暫時拋開分歧開P，眾星變身聖誕老人派禮物畀小朋友，驟眼睇落氣氛都幾融洽。曼聯射手朗尼去咗瑞士小鎮陪班年輕球員練波，肯定係佢哋今年嘅最佳聖誕禮物。至於昆士柏流浪球星施斯就一身「窩釘look」同緋聞女友克洛艾（Chloe Green）情侶裝夜遊，睇怕今個聖誕唔使一支公啦！
皇馬開P寸王黑面
皇馬將帥不和傳聞炒到熱辣辣，但會方如常舉行一年一度嘅聖誕聚餐，備受壓力嘅寸王教頭莫連奴都有到場，但全程木口木面，心情麻麻。喺呢個慈善聚餐中，皇馬眾星C朗、卡卡同比比等球星負責派禮物畀小朋友，個個交足戲笑到四萬咁口，睇落氣氛都唔錯。
不過，皇馬會長皮里茲發表講話時都係忍唔住暗寸莫帥，皮里茲話：「無論企喺體育或個人角度，我哋迎接挑戰時都唔應該放棄！」莫連奴早前公開發表「投降論」，表明皇馬失分太多，已經難望追到死敵巴塞搶番個西甲錦標，今次皮里茲呢番說話似乎有心回應佢喎。