歐聯抽籤結果同綵排相同，引起網民熱議，英國有數學專家指呢種情況好罕見，若然轉化成賠率，最少都要有5000倍，不過，英國博彩公司威廉希爾開出「歐聯正式抽籤同綵排抽籤結果相同」賠率僅得1,680倍，另一莊家Coral更只得1,000倍，令唔少博彩人士怒斥有人「造假」。Coral發言人話：「綵排同真正抽籤結果一樣真係好巧合，但根據賽制有部分對碰冇可能出現，所以分頭冇想像中咁好。」抽籤係實時舉行，若然咁都有人做到手腳，咁都幾犀利喎。

另外，巴塞隆拿球星韋拿盛傳會喺一月被借走，英國skybet有開盤，本來去史雲斯有41倍，但突然瘋狂落飛至1.72倍，skybet發言人表示：「事態發展確係有啲突然，但我哋係根據受注情況而改變賠率，似乎有人收到內幕料。」之前有傳阿仙奴有機會借到韋拿，但以現時情況睇，史雲斯好有機會奪得心頭好噃。