足球名將踩入賽車場，「金童」迪比亞路、巴夫斯打對台？意大利球星迪比亞路尋日宣布，佢會同美國型男紅星Patrick Dempsey合組車隊，準備參戰今年嘅勒芒24小時耐力賽，咁啱法國傳奇「光頭門神」巴夫斯亦決定今年殺入呢項國際大賽。2大球星鬥完波又鬥車，噱頭十足！

迪比亞路今季轉投FC悉尼，唔少球迷以為佢「冇晒火」喺澳職養老，查實呢位意大利球星另有大計，尋日佢透過官網同twitter發表聲明，聲稱會聯同美國熱爆劇集《醫人當自強》男星Patrick Dempsey組成「Dempsey/Del Piero車隊」。38歲嘅迪比亞路會做埋老闆，但唔會親自落場。

迪比亞路聲明中表示：「我自細已經鍾情於賽車，今次合作令我有機會夢想成真，我哋期望車隊會達到好高嘅水平，終極目標係成為世界冠軍。」Patrick Dempsey亦好期待：「迪比亞路對勝利嘅渴求同領導才能，將會係車隊最寶貴嘅財產，佢會帶領車隊走向正確方向。」

新車隊以美國為基地，今日就會正式申請參加今年6月嘅勒芒24小時耐力賽，Patrick Dempsey會以車手身份參賽，另外2個車手係祖科士打同阿維拿迪，車隊同時會出戰美國勒芒（ALMS），未來幾個星期會陸續公布戰車、贊助商同車手，絕對係雄心勃勃。

今次迪比亞路派員征戰勒芒24小時耐力賽，可能會遇到一位老對手，原來巴夫斯自07年退休後就轉戰車壇，加入咗法國Sofrev ASP車隊任車手，2011年更喺全國房車賽贏過冠軍。據報巴夫斯亦計劃出戰今年勒芒24小時耐力賽，呢位41歲「光頭門神」向法國《Ladepeche》證實：「2011年冠軍令我信心十足，今年勒芒賽係我嘅目標！」

勒芒24小時耐力賽由法國西部汽車俱樂部主辦，至今已經搞咗90年，賽事喺每年6月嘅第2個周末舉行，由於比賽冇乜技術限制，加上直路較多，所以平均時速可以高達404公里，係汽車製造商展示汽車性能嘅大舞台。呢項年度盛事嘅影響力僅次F1，比賽特色係連續駕駛24個鐘，對車手嘅精神、耐力同鬥志有極高要求。