紅軍撻Q 假波集團都中招
|
|
|
||||||||||||
09年歐聯鬥迪比辛射極唔入
環球假波案愈演愈烈，涉案賽事同球員陸續曝光，丹麥傳媒大爆利物浦09年歐聯對匈牙利迪比辛成調查重點，迪比辛門將普利克錫（Vukasin Poleksic）被假波集團收買最少要失三粒，但「紅軍」唔生性僅贏一比○。跨國反假團隊查緊全球多達680場問題賽事，幕後黑手係來自新加坡嘅假波集團，歐洲足協會長柏天尼直言假波係足球之恥，再咁落去會係足球末日。
受賄門將收柯打要失3球
丹麥報章《Ekstra Bladet》大爆09年利物浦歐聯主場對迪比辛一戰係假波，客軍門將普利克錫早被不法分子收買，嗰場大細中位數係2.5球，佢被告知最少要失三球，不過，「紅軍」全場得七次射門中目標，僅憑古積特建功贏一比○。據警方發現嘅短訊內容顯示，假波案幕後黑手不滿利物浦隊長謝拉特連番失機，其後普利克錫喺另一場分組賽對費倫天拿再受賄，結果輸三比四完成目標，最終遭揭發被歐洲足協禁賽兩年。
呢場賽事只係冰山一角，歐洲刑警（Europol）透露歐洲有380場疑似假球，除咗歐聯出事，世界盃外圍賽亦逃唔過假波集團魔掌，計埋非洲、亞洲及拉丁美洲，全球問題賽事多達680場。有調查員指出，呢宗史上最勁嘅假波案幕後黑手來自新加坡，涉案球員及球證多達425人，分布喺15國和地區，當中有50人已被捕，部分人平均每場收取多達10萬歐元賄款。Europol指揮官溫賴特（Rob Wainwright）表示：「呢啲係歐洲足球之恥，各國賽會應該睇緊啲！」
1周生意勁過NIKE全年
足球博彩業吸金力強，嚟緊歐聯皇馬大戰曼聯賽事，單計英倫投注額保守估計多達數百萬鎊，預期亞洲地區更高達數億鎊，據消息人士透露，亞洲地下莊家一周營業額拍得住著名運動品牌NIKE一年營業額，絕對係天文數字。
歐洲足協會長柏天尼談及假球案時表示：「反歧視同暴力問題要正視，但我哋更擔心假波問題，呢個絕對係足球之恥，如果你聽日睇場波，戰果一早已被操控，咁嘅足球死得啦！」
數讀假波案
‧涉案賽事由2008至2011年，共3年舉行
‧1場假波可涉及來自10國共50個犯人
‧奧地利警方正調查20名涉嫌收受賄款嘅疑犯，當中有部分係球員
‧德國警方指涉案人士來自15國，多達425人，當中50人被捕
‧150宗案件被發現同新加坡假波集團有關，單場賄款多達10萬歐元
‧300場疑似假球來自非洲、亞洲及拉丁美洲
‧380場疑似假球來自歐洲，當中包括歐聯
‧反假波組織統計全球每年運動博彩投注額達一兆，當中大部分來自足球博彩