雕像呢家嘢，99.999%都係用嚟向人致敬，AC米蘭射手巴洛迪利打破呢個框框，搵咗個本土藝術家幫佢整個真人比例雕像。「巴神」已經落咗柯打，要以佢去年喺歐國盃對德國士哥後除衫慶祝動作為創作藍本，自戀程度嚇親街坊，睇嚟球壇自戀狂C朗都要向佢寫個服字！

巴洛迪利向來多搞鬼嘢，今次突然興起整個雕像送畀自己，馬上聯絡意國藝術家史卡比拉（Livio Scarpella），佢向布雷西亞傳媒爆料：「我收到個特別任務，要幫巴洛迪利整個像，我未見過佢真人，淨係睇住相創作。」佢透露「巴神」嘅要求：「我整咗幾張草圖畀佢睇，佢話想整入波後嘅『甫士』，最緊要展示佢一身結實嘅肌肉，同時帶有挑釁對手嘅面部表情。」

聽完「巴神」要求，即時令人聯想到佢去年喺歐國盃四強對德國嘅慶祝動作，當日佢士哥後除咗件波衫狂騷巨肌，仲要木無表情招招積積，掀起一陣網絡改圖熱潮。史卡比拉跟住講埋自己嘅想法：「我想像巴洛迪利係個遠古時代嘅選手，個雕像係青銅色，雙眼以珍貴寶石製成，風格介乎古典同現代之間。」雕像完成後會送去巴洛迪利喺布雷西亞間屋，佢實叫晒班親戚朋友欣賞。C朗喺屋企牆上整咗張個人巨型裸照都夠晒自戀，但都唔及巴洛迪利打造雕像咁誇張。

查實巴洛迪利不嬲都係自戀狂，前曼城隊友米卡李察士曾向傳媒爆料，「巴神」試過對住班隊友大叫「你哋擘大雙眼睇吓我幾靚仔，我一定可以追晒世界上所有索女o架」，如果唔係食錯藥，有乜可能講呢啲嘢先得o架，可見佢對自己外形信心十足。