乙組仔係時候振作喇
2013/06/02
港甲聯賽「唔降又降」事件據說令三支升班馬中晒招，齊呼「早知唔升啦」，有早知冇乞兒，呢個世界有人蝕底，就梗有人賺凸，否則邊有咁多金融大鱷。依家有番升降制，據知大埔、大中同黃大仙幾隊都想升班，乙組聯賽當堂朝氣勃勃。
呂志興「夠雷」共同進退
畀人老點咗，再做大喊十根本冇意思，警訊成日有做街頭騙案，案件重演之後，仲有麥振江行入鏡頭提醒大家：「騙徒手法層出不窮，各位市民要提高警覺喇！」但係一樣日日有人領嘢，所以受騙人士嘈都冇用，惟有下次醒目啲喇。
有番升降制，被踢落乙組嘅大埔突然充滿希望，外號「富善邨施丹」嘅呂志興同一班大埔兄弟就決定同球隊共同進退，一齊落乙組，興仔話雖然有甲組會搵佢，但佢以大埔優先，而且佢以前做兼職嘅舊老闆都話會請番佢，大埔下季一個星期操三課，勤操有戰意，重返甲組指日可待。
由於只有一個升班名額，下季乙組形勢就好緊湊，臨尾錯失升班資格嘅大中，丙組升班球會黃大仙據說都有機會，其實港會都有能力升班，佢哋要人有人，要場有場，要錢有錢，可惜佢哋唔搞職業，唔符合「鳳凰計劃」要求而升唔到班，實在嘥料。
球壇 股壇 馬壇瓣瓣啱
唔使憂柴憂米專抱打不平