官恩娜想跳草裙舞慶祝
2013/06/17
大溪地位於南太平洋東部，屬於法屬玻利尼西亞最大島嶼，島上人口約十八萬，為南太平洋最多華人居住嘅地方之一。大溪地曾於2009年打入世青盃決賽周，雖然當年分組賽三戰全敗，但已見當地足球水準發展極速，今年九月大溪地更會主辦沙灘足球世界盃決賽周，可見水準愈來愈高。
中國後裔陳秀孭飛
講起大溪地，大家自然會諗起喺當地出生嘅香港女歌手官恩娜，佢話知道祖家球隊打入洲際國家盃既緊張又興奮，雖然本身唔算忠實球迷，今晚都會睇直播捧場，雖然對手實力強，佢認為只要踢出體育精神就夠，如果到時入到波可以跳草裙舞慶祝當然就更加開心！
除咗官恩娜，大溪地亦有一張亞洲面孔，佢就係正選前鋒陳秀喇！呢個23歲後生仔，雖然正職只係做電話公司操作員，但於當地卻紅到發紫，若非佢於2012年大洋洲國家盃決賽射入奠勝球，大溪地都冇踢洲際盃。
陳秀嘅祖父母同曾祖父母都係中國人，佢本身都識講客家話，目前効力國內勁旅查根，去年佢一腳轟爆新喀里多尼亞大門，大溪地贏1比0，奪得史上首個大賽冠軍，陳秀真係畀人當神咁拜。今次登上世界大舞台，陳秀話可以鬥西班牙令佢好興奮，但最想始終係同尼馬較量，不過大溪地同巴西並非同組，要達成願望起碼要晉級先得。