大溪地士哥拿全職送貨司機

大溪地喺足球壇名不見經傳，大部分都係業餘球員，來自搬運工人、會計、教師等各行各業，當中有九人做緊「量地官」添。至於上仗對尼日利亞為大溪地取得國際大賽首個士哥嘅莊拿芬泰希奧，據報正職係做送貨司機，佢嘅夢想係加盟「地上最強」巴塞隆拿。雖然此夢真係好難圓，但今晚有幸同西班牙球員同場較技，都算係還咗心願喇！根據德國《轉會市場》網站嘅數據顯示，大溪地身價最高嘅球員，係只值40萬歐元嘅外流射手華希路亞，全隊23人總身價僅得200萬歐元，而西班牙淨係中場球星恩尼斯達嘅估價都值7,000萬歐元，「小白」一人等於大溪地全隊嘅35倍，真係差天共地。