姚學文棄消防追夢想
2013/07/06
11年前為了「安穩」放棄理想，96至97年度球季「最佳年青球員」姚學文，選擇在24歲轉行投考消防員；11年後為了理想放棄「安穩」，已是兩女之父的姚學文，選擇在35歲辭任消防員重返甲組。
多謝老婆體諒
姚學文表示自已好喜愛足球，一直以做到職業球員為榮，當時球市轉差，加上剛成家立室，好需要穩定嘅收入，令生活有保障故投考消防員。但為何11年後又放棄薪金優厚嘅消防工作走番去球場？「阿文」嘆一口氣後道：「我愈嚟愈發覺我自己唔甘心、唔甘於平淡、唔甘於冇夢想。直至上年東方沙龍搵我幫手爭升班，愈踢我愈發現，原來我嘅心仲未死，季中我已經開始心郁郁，直到攞咗升班資格，我終於忍唔住開口向老婆提出再踢甲組嘅意念。初頭老婆都有擔心，驚我太衝動，但我同佢講考慮得好清楚，我好想再踢甲組、好想再同高水準嘅對手較量、好想再打決賽、好想再行上大球場嘅樓梯高舉獎盃、好想再……多謝老婆佢明白同體諒，畀我呢個有兩個女嘅爸爸，今時今日再去追尋夢想。」
除了感謝愛妻力撐，「阿文」亦十分感激東方沙龍會方支持，特別是老細「黎生」，他說：「季尾老細同我傾過偈，佢知道我嘅想法之後，同我講升班之後會預埋我，但有冇得踢就要靠我自己，用表現去說服教練『和仔』，一年之後會喺佢旗下業務安排工作畀我，等我太太可以安心之餘，我亦可以放心去追夢。」
姚學文小檔案
年齡：35歲
位置：左、右翼、前鋒
家庭狀況：已婚、育有兩女
曾効力球會：流浪、快譯通、晨曦、消防