細哨王者再臨
2013/07/26
助明尼路逆轉捧自由盃
「細哨」朗拿甸奴王者再臨，登南美之巔！呢位前世界足球先生昨晨協助明尼路喺南美自由盃決賽次回合，以2比0力挫巴拉圭球隊奧林比亞會，收復首回合失地，並憑互射12碼勝出，首次奪得呢項錦標。呢位巴西名將成為史上第7位包攬歐聯及自由盃兩大洲球會最高殊榮嘅球員，喺足球生涯黃昏時期，迎來第二春。「細哨」以行動證明自己力足佔巴西國家隊一席位，目標直指明年世界盃決賽周，創造球壇傳奇。
巴西勁旅明尼路首回合作客輸0比2，今仗回主場喺朗拿甸奴率領下絕地反擊，下半場靠祖奧及李安納度施華各入一球，總比數追和2比2。雙方加時冇建樹，需要互射12碼分勝負，明尼路4射全中贏4比3，第一次捧起地位就等如歐聯嘅自由盃冠軍。
朗拿甸奴雖然冇波入，但多次策劃攻勢及射門，贏盡球迷掌聲。回想佢兩年前失意歐洲，重返巴西搵食，令人以為佢會步「大哨」後塵，從此一蹶不振。不過呢位33歲老將用表現顯示自己老而彌堅，佢喺今屆自由盃取得4個入球及7次助攻，重拾7年前為巴塞隆拿奪得歐聯冠軍嘅風采。
第７位「雙冠」球員
朗拿甸奴捧盃後，繼蘇連、卡富、迪達、洛基祖利亞、泰維斯、森美爾之後，史上第7位囊括歐洲及南美洲球會最高殊榮錦標嘅球員，可見返祖家絕非養老，爭勝鬥心不減當年。
有望重返森巴兵團
事實上，朗拿甸奴一直渴望重返「森巴兵團」，參加明年喺祖國舉行嘅世界盃決賽周，經此一役後，相信佢喺巴西主帥史高拉利心中，肯定大幅加分。值得一提，入波功臣祖奧亦曾經喺曼城等歐洲球會鬱鬱不得志，依家不但一嘗自由盃冠軍滋味，更以7球成為賽事神射手，終於吐氣揚眉。
本報綜合報道