英軍WAGs反轉巴西
世盃准攜眷 鶴臣使出美人計
英格蘭球星女伴（WAGs）再掀粉紅風暴，吹襲巴西世界盃！英格蘭國家隊領隊鶴臣「美人計」激勵軍心，表明容許國腳攜眷出戰6月巴西世界決賽周，仲可以隨隊去之前嘅美國集訓，為愛郎打氣。「德政」出台，世間從此多事，皆因英軍「太太團」以高調爭妍鬥麗聞名，藉此提升個人知名度，進軍娛樂圈或商界搵銀，屆時勢必使出渾身解數，爭做一姐，隨時好睇過場上比賽。
鶴臣公布新一期國家隊30人大軍名單，備戰下周中熱身賽主場對丹麥，並帶來一個令人「振奮」嘅消息，呢位老帥話：「球隊將於6月初去美國邁阿密集訓，球員可以帶埋伴侶一齊去，世界盃舉行期間亦一樣，我相信老婆或女友喺身邊，球員會更專注比賽。」鶴臣仲有溫馨提示，話巴西治安麻麻，球隊唔會負責WAGs人身安全，到時有乜三長兩短，佢哋要自行負責。
英軍WAGs一向係索女集中營，06年德國世盃，以「咸嫂」維多利亞為首嘅太太團，魅力比球星有過之無不及，每次行街消遣都成為傳媒焦點，期間甚至發生喺酒吧同人爭吵事件，被指影響軍心。前主帥卡比路禁止WAGs出席上屆南非世界盃，但成績都唔見起色，鶴臣今次乾脆賣個人情畀球員，希望佢哋生生性性。
新一代英軍WAGs，以曼聯中場湯卡華利嘅女友Georgina Dorsett最索，呢位28歲電視台真人騷姐仔做過內衣模特兒，樣子嫵媚、身材火辣，即使做咗媽媽都冇走樣，被睇好可艷壓群芳做一姐。
「迪哥」有望首披鬥牛國戰衣
世界盃盟主西班牙亦公布下周中熱身賽對意大利大軍名單，馬體會前鋒迪亞高哥斯達有機會首次代表西班牙上陣。迪亞高哥斯達曾代表巴西喺熱身賽上陣，但佢最終選擇代表西班牙，佢喺上年11月已曾入選西班牙大軍，但當時因傷未有披甲，其馬體會隊友韋拿、車路士前鋒費蘭度托利斯及曼聯中場桑馬達則告落選。
英格蘭30人大軍名單
門將
赫特(曼城)、魯迪(諾域治)、費沙科士打(些路迪)、賓科士打(西布朗)
後衞
加利卡希爾(車路士)、艾殊利高爾(車路士)、格連莊臣(利物浦)、基斯史摩寧(曼聯)、巴尼斯(愛華頓)、基爾獲加(熱刺)、勞基梳爾(修咸頓)、哥爾卡(卡迪夫城)
中場
卡域克(曼聯)、湯卡華利(曼聯)、謝拉特(利物浦)、史達寧(利物浦)、佐敦軒達臣(利物浦)、阿歷士張伯倫(阿仙奴)、韋舒亞(阿仙奴)、巴克里(愛華頓)、林柏特(車路士)、占士米拿(曼城)、安祖斯唐辛(熱刺)、拉爾拉拿(修咸頓)
前鋒
朗尼(曼聯)、韋碧克(曼聯)、史杜列治(利物浦)、列基林拔(修咸頓)、積洛迪古斯(修咸頓)、迪科爾(FC多倫多)