伊巴謙莫域「重建」巴黎聖日耳門Canteen！呢位瑞典國腳精湛射術睇到球迷如癡如醉，勢估唔到佢入波刁鑽不特止，就連食嘢都特別嘴刁，佢早幾日投訴球會膳食冇厘質素，搞到PSG要請過另外兩名大廚每日搜羅新鮮食材，兼夾購買新鮮製麵條機，打造啱晒佢口味嘅「伊巴謙飯堂」。

法國《巴黎人報》爆料，伊巴謙莫域唔滿意PSG個飯堂食物質素欠佳，仲要來來去去都係嗰幾味餸，食到口寡寡。聖日耳門聽見伊巴謙投訴後，即時請兩名球會大廚食「豉椒炒魷」，再另行聘請兩名新大廚，夥拍總廚Stephane Michon每日去街市同商舖搜羅新鮮食材，並引入製造新鮮麵條嘅機器，務求確保食物質素，同埋菜式唔會悶親呢位「食家」。至於PSG原定每人每日15歐元（約150港元）嘅伙食費，亦因而大幅提高。

其實又好難怪PSG咁緊張，伊巴謙莫域喺法甲入波入唔停，現時以23球高踞聯賽射手榜，比起隊友卡雲尼足足多9球，呢班波食粥食飯靠晒佢，又確實唔敢得罪呢位大帝。不過英國《每日郵報》就攞伊巴謙個最新廣告嚟講笑，引用廣告主題「敢於挑戰伊巴謙」，惡搞為「敢於為伊巴謙煮飯」，寸爆佢對膳食要求多多。