上星期《葡語教室》第一次同大家見面，學咗「Feliz」呢個字，係咪覺得葡文好好玩呢？今期當然繼續學嘢啦！好多西班牙國家隊嘅擁躉，都好關心「過底前鋒」迪亞高哥斯達，今夏喺巴西世盃嘅表現，幫唔幫到「狂牛」成功衞冕。不過睇怕迪亞高哥斯達本人，目前都未必會諗得太遠，只會關心踢緊嘅馬德里體育會，可唔可以打破近年巴塞同皇馬嘅壟斷，勇奪今季西甲冠軍。

馬體會上場以1:0力克華倫西亞後，只要喺餘下3仗勝出2仗，就可以唔使理皇馬同巴塞嘅戰績，成為西甲王者。當擊敗華倫後，「床單軍團」教練施蒙尼被葡萄牙傳媒問到，喺巴塞近況飄忽，以及皇馬要分心歐聯下，佢哋係咪距離冠軍好接近時，佢就答道︰「Nao e bom pensarmos que o titulo ja esta ganho」意即「依家去諗係咪已經贏得冠軍並唔係太好」。

葡文中嘅Bom（發音近似：邦），意思同英文Good一樣，跟上一期介紹過嘅Muito（發音近似：梅圖，意即非常）一齊用，Muito Bom（發音近似：梅圖邦）意思就等於英文嘅「Very Good」，係最常用、最簡單嘅讚美用詞。另外，Bom亦經常出現喺葡文嘅問候語中，英文有Good Morning、Good Afternoon同Good Evening，葡文則有Bom Dia（發音近似：邦吱呀），解作早晨。但葡文嘅午安同晚安就有少少分別，Good Afternoon係Boa Tarde（發音近似：波呀戴池），Good Evening係Boa Noite（發音近似：波呀奈池），係唔用個Bom字嘅。