郭家明入球大好友
2014/06/06
同世盃最Close嘅香港人
香港隊雖然冇份打世界盃，但都唔係完全零參與。身兼中國足協技術主任及足總顧問等職銜、外號「智多星」的郭家明，連續3屆世盃獲委任為國際足協技術研究小組（TSG）成員，係參與世盃運作最深入嘅香港人，今日Men Club就由「郭指導」分析形勢，佢話整體預計會好多波入。
現在介紹郭家明已經唔使再提當年「519」嘞！因為佢已經成為國際足球壇「專家中的專家」，躋身TSG行列，全亞洲只係得兩個名額咋，一個係佢，另一個就係前日本國腳宮本恒靖，現年64歲嘅郭家明可以隨時講出今屆世盃A至H組係邊幾隊，非常專業。問佢點睇各組出線形勢，佢話：「只要巴西同德國首名出線，一路晉級，兩隊就會喺4強相遇，另一邊4強就係阿根廷對荷蘭或者西班牙，如果呢幾支強隊入晒4強，將會係最強戲碼。」
郭Sir指出，對上兩屆賽事的冠軍球隊都被批評入球偏少，但今屆相信有機會扭轉呢個局面，出現大量入球：「06年冠軍意大利7場僅攻入12球已經畀人鬧入得少，點知上屆冠軍西班牙仲少，得8球，不過今屆賽事喺南美洲舉行，世界足球亦有轉向趨勢，因此預計會是一屆多入球嘅決賽周。」
巴西爭標唔夠穩陣
講到奪冠機會，郭Sir指巴西始終是最受注目一隊，但唔太穩陣：「巴西雖於去年主場奪得洲際盃，但當時各隊心態都是志在試場同試陣，到世盃比賽嗰陣，巴西主場將會背負沉重壓力，希望佢哋頂得住。」
郭家明將會喺明天（6月7日）啟程去巴西，跟住就不斷穿州過省睇比賽，直至決賽結束後7月中至返香港，足總副主席貝鈞奇昨日特別為佢餞行，預祝佢順利完成任務。
郭指導檔案
年齡：64歲
銜頭：MBE,JP、FIFA技術研究小組成員、亞洲足協顧問、中國足協技術主任、香港足總顧問、前港隊球員及教練