尼馬老竇夜蒲攬錫兩囡囡
2014/06/23
個仔喺世盃搏殺，但個老竇就畀人影到「喜愛夜蒲」，真係咩世界呀？尼馬貴為「新比利」，肩負帶領「森巴兵團」6奪世盃嘅重任，決賽周期間真係要高度集中備戰，家人嘅支持亦都好重要，但勢估唔到佢老竇做壞榜樣，竟然喺呢段時間畀狗仔隊影到夜蒲攬女！
巴西報章《Extra》日前大爆，尼馬老竇喺當地時間上星期四傍晚，單拖去到里約熱內盧一間新開嘅夜場Happy，短短兩粒鐘時間已經「覓食」成功，畀狗仔隊影到佢左擁右抱，攬住兩個金髮索女出門口，仲向佢哋錫錫兼咬耳仔，「下半場」有乜節目真係冇人知嘞！
好多巴西網民仲將其中一位金髮女郎起底，發現係身材火爆嘅「Model仔」Samantha，班網民唔「葡萄」就假啦，有網友留言話：「尼馬轉會巴塞佢老竇袋唔少，家陣已經係百萬富翁，大把女埋身好正常。」