今時今日，23歲仔可能先啱啱讀完書，連工都未返過，但今日（11月9日）23歲生日嘅YFC澳滌門將邱于銘，不僅四年前已經開始投身職業足球，更試過協助調查「假波案」、球隊散班、面臨失業……今季「肥邱」穩做球隊正選，滿以為「大個仔」嘅佢會雄心萬丈，為自己訂立更高嘅目標，但佢竟然話計劃踢多兩年就退役，認真估佢唔到呀！

今季替YFC澳滌把關表現穩定嘅「肥邱」，早前就憑如有神助嘅演出，協助球隊作客將軍澳運動場，賽和勁旅東方1:1。當日任東方麥阿里士打、基奧雲尼同「亨利」鄭少偉，點樣輪流喪射法，最後都係冇辦法令「肥邱」失第二球。「好開心！對住Big4之一嘅東方，我哋曾經領先，雖然最後被追和，但全隊上下力戰到底，攞到1分已經唔錯。當然場波攞到分係全隊功勞，我只係盡番守門員的本分啫。」「肥邱」講番場波都仲好興奮。

聽到邱于銘呢個名，可能好多球迷都會聯想到「正義」、「廉潔」等字眼，但原來2011年11月嘅「姚韡事件」中佢乜都冇做過：「我唔覺得自己正義或者廉潔，其實我乜都冇做過，只係去到球場知道自己冇份守，跟住完場去咗ICAC協助調查，就係咁咋！」「肥邱」仲話事件都告一段落，佢亦唔想去記住。

同樣係回憶，但効力南區畀「肥邱」嘅回憶就愉快得多！「短短兩季喺南區我都好開心，自己成長咗好多，好多謝馮凱文同董浩然兩位教練對我嘅信任，畀我好多落場機會。球隊最後因唔參加港超聯而『自降』，我同好多隊友都好失落，失落唔係因為驚失業，而係覺得可惜。但依家可以同魯賓、戴亞斯同迪基圖等繼續做隊友，總算可以將南區嘅精神延續落去。」

有人話有葉鴻輝一日，其他本地龍門最叻都只係可以做到「NO.2」，「肥邱」又點睇呢？「首先『阿輝』真係好勁，佢係我嘅學習對象，況且我有好多不足，『NO.2』其實已係一個好高嘅目標喇，但點都好，我都會繼續努力。」聽到「肥邱」咁講，大家梗係以為佢對足球雄心壯志，但原來：「我同屋企人講好咗，全力搏殺多2年之後就會退役投考海關，始終喺香港做足球員冇乜保障，到時真係唔捨得都冇辦法，畢竟要為將來生活打算吓。」點都好啦，人各有志，「肥邱」祝你生日快樂！