Football

皇馬搶首名贏多鋪

2016/12/07

今晚係歐聯最後一輪分組賽,F組嘅皇家馬德里會喺主場迎戰多蒙特。兩軍雖然都已經出咗線,但皇馬今仗贏波可攞到F組首名,加上近年作客多蒙特輸多贏少,呢次回師主場,爭勝心始終較「蜜蜂兵團」強,細鬼決定簡簡單單捧皇馬1.7倍主勝。

(有線61及201台周四凌晨3時45分直播)

多蒙特同皇家馬德里已經雙雙喺F組提早出線,但由於皇馬目前排第2,以兩分落後畀「蜜蜂兵團」,皇馬如果想首名出線,今仗必須要喺主場擊敗多蒙特。皇馬剛喺「國家打吡」同巴塞隆拿踢成1比1,雖然經歷完大戰但好彩冇主力球員受傷,陣中只有翼鋒加里夫巴利、中場卻奧斯同前鋒艾華路莫拉達因傷繼續休戰,主力好似基斯坦奴朗拿度(C朗)同賓施馬都可以上陣,對球隊實力冇咩影響。

皇馬上次作客多蒙特和2比2,13及14年連續兩屆喺歐聯淘汰賽亦作客輸過畀多蒙特,今仗自然希望復仇,再加上佢哋歷來23次喺歐戰主場迎戰德國球隊,錄得20勝3負嘅成績,今仗值得睇高一線。

多蒙特作客欠穩定

多蒙特今場只要能保持不敗,就可以取得首名出線席位,但球隊作客成績只屬一般,喺德甲曾經輸過畀法蘭克福同利華古遜等球隊,可見呢班波客場水準唔算穩定。「蜜蜂兵團」今季長期受傷兵困擾,好似中場施雲賓達同路文貝基今仗都唔出得,球隊防線近期表現一般,上輪歐聯分組賽對歷基亞竟然失咗4球,好在有養傷多時嘅馬高列奧斯貢獻3個入球,球隊先可以大勝一仗。「蜜蜂兵團」今仗造訪皇馬,相信唔會咁易入到波,而後防亦未必頂得住C朗同賓施馬嘅攻擊,所以細鬼睇好皇馬可以喺主場贏波,主W有1.7倍值得支持。

波經所提供之資訊概以較新版本為準,並已力求精確可靠,但不保證絕對無誤。
資料只供參考用途,如有錯漏而導致閣下蒙受損失,本公司概不負責。