歐聯尋晚進行16強抽籤，首次參賽嘅上季英超冠軍李斯特城抽好籤，成功避開皇家馬德里、拜仁慕尼黑等超強次名，將會與歐霸盃3連霸盟主西維爾爭入8強，有機會延續神奇之旅。另一支英超代表阿仙奴就唔好彩，抽中老對手德甲拜仁慕尼黑，想打破連續6屆16強出局命運唔容易。衞冕嘅皇家馬德里則會對意甲拿玻里，比起宿敵巴塞隆拿硬撼法甲巴黎聖日耳門，皇馬過關難度相對較低。

李斯特城今屆首次打入歐聯分組賽表現令人眼前一亮，踢完5輪分組賽已穩奪首名資格晉級，尋晚佢哋喺16強抽籤繼續有運行，雖然對手西維爾係3屆歐霸盃冠軍，不過相比其他小組次名球隊好似皇馬、拜仁及PSG等等，李斯特城對住西維爾肯定較易應付，有望延續神奇之旅。不過抽籤後，西維爾奪標賠率由60倍急降至35倍，李斯特城就由35倍退熱至40倍，睇嚟足智彩唔睇好「狐狸」喎！

至於另一支英超球隊阿仙奴最後一輪分組賽雖然作客大勝巴素利4比1，並把握PSG失分搶得小組首名出線，可惜命運弄人，兵工廠將會遇上冤家拜仁慕尼黑。阿仙奴對上6屆喺歐聯16強出局，其中12/13及13/14球季正正就係輸畀拜仁，上屆兩軍喺分組賽碰頭，阿仙奴作客亦曾慘敗1比5，阿仙奴球迷真係灰到爆。

至於被阿仙奴搶走小組首名嘅PSG亦唔好過，將要面對擁有「MSN」嘅巴塞隆拿。PSG曾經喺14/15球季8強輸畀巴塞，如今PSG教練換上有多年西甲執教經驗嘅艾美利，睇吓可唔可以報番一箭之仇。歐聯16強首回合將於香港時間明年2月15、16日及22、23日舉行，次回合則於3月8、9日及15、16日舉行。