尼馬走法律罅轉會PSG
2017/07/31
收27.5億大使費自己贖身
尼馬驚世轉會掠到盡！法國豪門巴黎聖日耳門（PSG）收購尼馬已經進入最後倒數，當中涉及嘅天文數字金額亦陸續曝光，尼馬老竇兼經理人竟然可以「獨食」6,200萬歐元（約5.7億港元）。更加震撼嘅係，PSG為逃避財政公平條例，將以間接方式「科水」3億歐元（約27.5億港元）畀尼馬自己贖身，西班牙聯賽會已表明會提出控告。
疑似告別戰 巴塞3:2贏皇馬
據報已經同PSG簽約5年嘅尼馬，昨晨國冠盃繼續為巴塞隆拿正選披甲，喺呢場「疑似告別戰」入面，尼馬雖然冇波入，但表現落力兼且交出2次助攻，結果巴塞隆拿憑美斯、拿傑迪錫同碧基入波，以3比2力克死對頭皇家馬德里。為「銀河艦隊」入波嘅係高華錫同馬高阿辛斯奧。
尼馬完成巴塞隆拿美國之旅後，消息話佢會依照原有計劃，飛到上海代表巴塞出席商業活動，不過西班牙傳媒收到料，期間尼馬會宣布轉會PSG，同時喺星期二抵達卡塔爾，正式出任2022年世界盃大使。據報尼馬今次出任世盃大使，酬勞係超誇張嘅3億歐元，而畀錢嘅正正就係PSG班主艾卡理化。
西班牙《世界體育報》爆料，PSG為逃避歐洲足協嘅財政公平條例，會透過艾卡理化嘅卡塔爾體育公司出手，掛名以3億歐元酬勞畀尼馬做「大使費」，尼馬拎到錢就可以用2.22億歐元買斷同巴塞隆拿嘅合約，所以呢筆數完全唔會出現喺PSG嘅帳目入面，自然唔會違反財政公平條例啦。
PSG被責逃避財政公平條例
PSG擺明走法律罅，西班牙聯賽會行政總裁泰拔斯就嬲到爆：「我哋會向歐洲足協投訴，因為PSG違反歐洲足協財政公平條例同歐盟嘅競爭法，如果歐洲足協坐視不理，我哋就會告上瑞士同比利時嘅體育仲裁法庭，亦唔排除會將件事擺埋上法國同西班牙嘅法院，今日發生喺尼馬身上，受害嘅係巴塞，將來受害嘅可能係皇馬或者馬體會。」
老竇獨食5.7億賺到盡
今次轉會當中，身為尼馬經理人嘅老竇尼馬達斯華就係大贏家，據報尼馬達斯華將收取PSG高達3,600萬歐元嘅經理人費，更加諷刺嘅係，尼馬同巴塞隆拿之前合約訂明，只要呢位巴西國腳喺7月31日仍然留隊，就可以獲得2,600萬歐元「忠誠獎金」，呢個亦係尼馬轉會一直拖到8月先落實嘅最大原因。