A山留廠捱多季
2017/08/08
等明年7月自由身至走
阿歷斯山齊士跪低，決定留隊！不過「廠迷」唔好開心住，事關呢位智利射手並非真心效忠，純粹想等明夏約滿以自由身離隊，恐怕無心戀戰！屋漏偏逢連夜雨，領隊雲格透過，兩位中場主將奧斯爾及艾朗藍斯仍未傷愈，好可能錯過香港時間周六凌晨英超揭幕戰主場對李斯特城，加埋「社區盾魔咒」，小心開局中伏。
雲格留唔住佢個心
阿歷斯山齊士日前先至歸隊，未夠狀態出戰前晚社區盾，但都有現身為隊友打氣。英國《鏡報》爆料，指A山深知會方唔會放人，已打消今夏離隊念頭，等到明年7月約滿先至走人，因為屆時新球會唔需支付巨額轉會費，會比較願意以超高人工簽佢，唔介意再等多一季。雲格留住A山嘅人，留唔住佢嘅心，睇怕都係徙然。
奧斯爾藍斯難踢開鑼戰
與此同時，阿仙奴未開鑼已爆傷兵潮，中堅梅迪薩卡喺社區盾撞傷額頭，縫咗10針，但無礙英超揭幕戰對李斯特城。不過，另外2位「槍手」就冇咁好彩，雲格話：「奧斯爾足踝有傷，艾朗藍斯小腿有問題，周五晚上陣機會好微。」值得一提，2011年開始，捧社區盾嘅球隊，最終都贏唔到該季英超冠軍，難怪車仔主帥干地「禮讓」搵門將泰拔高圖爾斯主射12碼，轟上看台，利物浦名宿謝拉特貼曼城捧今季英超。