未出線就卜定俄國酒店 意大利足總遭恥笑
2017/11/18
意大利悲情緣盡2018年俄羅斯世界盃，唔單止球迷覺得意外，原來連意大利足總都冇諗過會有呢個結局！據報意足總一早已經派人去俄羅斯，搵定酒店作為決賽周期間嘅大本營，而且訂好晒房，依家冇得去惟有取消行程，搞到有網民忍唔住笑佢哋太高估自己。
其實意大利畀人恥笑背後，都可能幫到人，因為丹麥足總主席已經確認，有興趣入住意大利訂好嘅酒店房，雖然佢哋話，其實間酒店唔算完全符合心水，但丹麥要喺世盃附踢走愛爾蘭先晉級，已經慢過其他球隊好多，所餘選擇已經冇乜，有地方住好過冇喎！
擬聘文仙尼掌帥
至於意大利炒咗領隊雲杜拿後，安察洛堤、干地等都被視為新帥熱門，不過有消息指足總打算搵辛尼特主帥文仙尼，文仙尼證實：「意大利搵緊一個有經驗同喺唔同地方取得成功嘅人執教，所以我對自己喺名單上面唔覺得驚奇，不過我依家會集中精神為辛尼特爭奪聯賽冠軍。」文仙尼今季執教辛尼特，重金禮聘阿根廷射手迪奧斯加盟，原來呢位21歲前鋒擁有意大利護照，消息指意大利已經邀請佢加入，唔通係為文仙尼上任鋪路？