接班C朗！夏薩特18.4億去皇馬？
2018/07/12
昨日世界球壇2大話題，法國殺入世盃決賽、C朗拿度過檔祖雲達斯，將會串連成夏薩特嘅神奇故事！「夏世三」領軍嘅比利時雖然喺世盃4強出局，不過佢仍然唔憂前途，事關啱啱賣走C朗嘅皇家馬德里，已經決定收購夏薩特做「球王接班人」，預計轉會費會高達2億歐元（約18.4億港元）！
皇馬賣走C朗後，肯定會收購頂級巨星嚟接班，法國新人王基利安麥巴比、巴西球王尼馬一直被視為熱門人選，但西班牙媒體《Diario Gol》指出，皮里茲已扑槌將C朗件7號波衫留畀「夏神」。夏薩特一直仰慕皇馬前教練施丹，多次表示要效法施丹嘅球王軌迹，雖然該法國教頭已經離隊，不過夏薩特喺世盃4強賽前，就公開表明想踢皇馬嘅心從未改變。27歲嘅夏薩特目前同車路士合約只係剩番2年，拖落去佢哋下年將會被迫賤賣，令車路士放人機會大增。
皮里茲愛釣世盃大魚
皇馬會長皮里茲出晒名鍾意喺世界盃「釣大魚」。2010年世界盃，德國中場奧斯爾被譽為歐洲最強年輕中場，皇馬喺世盃決賽周後即簽入呢位德國球星。上屆2014世界盃，哥倫比亞中場占士洛迪古斯上位，仲拎埋世盃神射手，皇馬決賽周後即買入「J神」。夏薩特決賽周表現證明自己「世界三大」嘅實力，加盟皇馬都係順理成章呀！
比利時雖然不敵法國0比1無緣殺入世盃決賽，不過夏薩特嘅個人表現仍然光芒四射！繼8強對巴西10次扭波100%成功後，今仗對住法國繼續「扭扭樂」，全場12次扭波又有10次成功，咁嘅表現，更加令皇馬動心。