歐聯　安聯夠惡 拜仁剷平曼城

【on.cc東網 專訊】歐聯分組賽今晚繼續有好戲，拜仁慕尼黑喺E組主場對曼城，讓半一上盤博得過。雖然拜仁傷兵滿營，但王牌列貝利已經傷愈復出，佢仲講明唔會理停賽傳聞，表態誓死效忠拜仁，相反曼城有領隊比歷連尼停賽，唔能夠喺場邊親自督師，好易出事。

今季拜仁冇乜霸氣，而且中堅畢杜斯巴上場傷埋，需要聯同翼鋒洛賓、中場舒韋恩史迪加、查維馬天尼斯同右閘拿菲爾養傷，好在發電機列貝利已經好番，日前拜仁作客以2:0砌低史特加，佢後備上陣同射手羅拔利雲度夫斯基眉來眼去，完場前更親自省番粒，證明已回復比賽狀態，大家唔使擔心佢冇貨賣。

事實上，列貝利上場接應羅拔利雲度夫斯基斜線單刀建功，粉絲開心到玩食字將佢兩個名合併做「Lewery」，證明威力有幾勁。除此之外，列貝利已打算將餘下職業生涯貢獻畀拜仁，佢無視歐洲足協主席柏天尼威脅，講明堅持拒絕法國國家隊徵召，玩到咁大，佢梗係要繼續為拜仁燃燒小宇宙啦，唔係邊有球迷撐佢？

另一方面，曼城日前以2:2打和阿仙奴，中場耶耶托尼獲安排休息，相信今場會重返正選陣容，可惜領隊比歷連尼同右閘薩巴列達停賽，當中比歷連尼冇得係場邊指揮，高手過招肯定蝕底，加上新簽嘅沙格拿同隊友冇默契，突然打正選隨時被列貝利爆死，就算射手阿古路傷愈後腳風勁順，都未必救到曼城口喎！