薩克達超新星搶手　今夏勢闖英超

《英超刨績王》加強版，最強數據一網打盡：http://win.on.cc/football/　

烏克蘭勁旅薩克達係歐洲賽常客，亦出產過唔少星級球員，今屆佢哋雖然喺歐聯出局空降歐霸，但陣中以色列翼鋒沙洛文就相當搶鏡，呢位21歲「扭波王」天賦極高，今季歐聯分組賽兩戰皇家馬德里都入波，據報已得到多間英超球會斟介，今夏勢必實現佢征戰英超嘅夢想。

沙洛文早前向以色列媒體證實：「我哋同幾間英超球會傾緊，夏天可能會有事發生，我嘅夢想係去英格蘭踢波，而英超亦係我目前最有機會去嘅地方。」消息指阿仙奴亦最有機會嘅一隊，而佢2年前效力彼達迪華馬卡比嗰陣，曾經同曼城斟介到最後階段，但球會突然坐地起價令交易告吹，結果佢就去咗薩克達。

薩克達周五(26日)凌晨歐霸盃32強次回合，主場迎戰特拉維夫馬卡比，首回合薩克達領先2球，沙洛文有機會繼續喺歐洲賽場展示實力。