阿仙奴杜拜集訓　韋舒亞着12號波衫

足球博彩神器，每日重心提供盡在《彩報》：http://win.on.cc/football/　

阿仙奴趁住英超休戰期，拉隊飛去杜拜進行集訓，因紀律問題被打入冷宮嘅奧巴美揚冇份隨隊出征，不過只係跟操嘅前英格蘭國腳韋舒亞竟然有份，而且仲被影到着住12號波衫練習，因而傳出佢有機會重返阿仙奴！

今個月阿仙奴不斷「清瘀血」，哥拉辛拿斯、美蘭尼爾斯、哥林張伯斯、柏保維拿等後備球員都被放走，但至今仍然未有增兵，令人手出現短缺，今次杜拜行亦徵召唔少青年軍球員，最令人意外嘅係跟操嘅韋舒亞都有份，佢練波所着嘅12號亦係目前未有人用嘅號碼，傳聞阿仙奴如果未能簽入新球員，可能會向韋舒亞開出短期合約。

韋舒亞依家只係30歲，佢日前表示仍然想喺英超比賽：「我一直都話今個月底會作出決定，喺阿仙奴跟操呢段日子，令我相信自己仍然可以喺英超立即，面對最頂級嘅球員我都可以跟足，呢個就係我可以繼續比賽嘅訊號。」