父子檔！馬體會或簽「小施」頂替蘇亞雷斯

最強博彩盤路過關神器《串績王》：http://win.on.cc/football/　

馬體會前鋒蘇亞雷斯將於今夏約滿離隊，已經成為公開嘅秘密，會方需要簽入新射手，西班牙傳媒指今季喺意甲表現大熟大勇嘅基奧雲尼施蒙尼成為收購目標，若然成事，佢就可以同身為教練嘅爸爸施蒙尼父子檔合作。

現年26歲嘅基奧雲尼施蒙尼係施蒙尼嘅大仔，但佢並未曾喺西甲搵食，近6年一直喺意甲打滾，效力過熱拿亞、費倫天拿、卡利亞里，今季被卡利亞里外借去維羅納，上陣32場聯賽入16球，創出個人單季聯賽入球新高。

西班牙傳媒認為「小施」有能力加盟大球會，令事業更上一層樓，轉投馬體會係一個唔錯選擇。事實上，基奧雲尼施蒙尼承認自己係馬體會球迷，希望有朝一日可以效力呢支西甲球隊，同爸爸拍住上。

5年前施蒙尼曾經表示，如果兩父子同隊，會令囝囝承受不必要嘅壓力，對佢足球事業發展不利。不過，基奧雲尼施蒙尼依家已經大個仔，相信識得處理壓力，都係時候幫助爸爸，帶領馬體會下季重回西甲爭標行列。