後繼有人　19歲「新莫迪歷」打救克羅地亞

最強博彩盤路過關神器《串績王》：http://win.on.cc/football/　

克羅地亞自2018年世界盃後，成績每況愈下，加上主將莫迪歷已經36歲，難免令人擔心球隊會青黃不接。幸好克羅地亞近年冒起1位新星，就係19歲中場蘇斯克，呢位小將有「新莫迪歷」之稱，肩負重振克羅地亞威名嘅希望。

蘇斯克喺奧地利出世，現時亦效力奧甲勁旅薩爾斯堡，年紀輕輕已成為主將，今季各項賽事上陣44場入11球。

蘇斯克除咗喺奧地利成長之外，本身亦有波斯尼亞、克羅地亞血統，一度可以選擇為呢3個國家比賽，最終佢揀咗代表克羅地亞，最主要原因係自細視莫迪歷為偶像，咁啱兩人名字都叫Luka，蘇斯克踢法的確有呢位皇馬球星影子，自然備受關注。

蘇斯克至今僅為克羅地亞上陣2次，上仗歐國聯對法國，正係由蘇斯克入替莫迪歷，有世代交接味道。薩爾斯堡近年有唔少球員被大球會收歸旗下，蘇斯克只要保持水準，登入豪門指日可待。