阿仙奴閃電出手　搶贏葡超新人王

最強博彩盤路過關神器《串績王》：http://win.on.cc/football/　

多間英國權威媒體爆料，英超勁旅阿仙奴將會簽入波圖22歲新星法比奧韋拉，呢位進攻中場係上季葡超助攻榜第2位，據報轉會費總值3,400萬鎊。法比奧韋拉周五(17日)已飛抵倫敦進行體測，將會簽約5年。

法比奧韋拉係葡萄牙小國腳，上年帶領葡萄牙喺U21歐國盃拎到亞軍，佢自己就當選賽事最佳球員。呢位進攻中場上季喺葡超上陣27場，雖然只要15場係正選，但已有6個入波同14次助攻，協助波圖奪冠，效率相當驚人。

據報阿仙奴將會向波圖支付3,000萬鎊轉會費，另加400萬鎊浮動獎金條款，只要通過體測就會簽約5年。