基亞利殊大戰拉斯維加斯　喪開116支酒

最強博彩盤路過關神器《串績王》：http://win.on.cc/football/　

曼城中場基亞利殊日前拉大隊，同一班朋友飛去美國拉斯維加斯度假，呢位身價高達1億鎊嘅英格蘭國腳財大氣粗，購買價值8萬鎊嘅酒店會所「VIP套票」，包括有116支名酒提供，並拖女飲到醉醺醺，認真放縱，唔知曼城主帥哥迪奧拿見到會點諗呢？

基亞利殊同8位好朋友浩浩蕩蕩抵達拉斯維加斯之後，已急不及待喺酒店會所開派對，除咗飲酒、唱歌、跳舞狂歡之外，仲有唔少女性主動埋基亞利殊身，喪玩到凌晨3點幾，基亞利殊帶1位長髮女子離開派對，期間有保鑣為佢哋開路。

由於眾人玩太高調，製造唔少噪音，有美國人唔認識基亞利殊，並問：「呢班到底係咩人，喺度大呼小叫。」

基亞利殊上年夏天以1億鎊轉會費，由阿士東維拉轉投曼城後，表現令人失望，各項賽事上陣38場僅入6球，而且經常擔任後備。呢位26歲球星唔止冇反省，仲掛住喪玩，恐怕事業前途唔樂觀。