蘇B蘭歷克睇唔上　曼聯2度拒簽馬天尼斯

最強博彩盤路過關神器《串績王》：http://win.on.cc/football/　

曼聯上場0比4輸畀賓福特，身高只有1米75嘅中堅利辛度馬天尼斯被指係「最大弱點」，據英國《The Athletic》報道，原來曼聯早就考察過呢位阿根廷中堅，不過2位前任領隊蘇斯克查同蘭歷克都睇唔上眼，認為佢太矮唔適合踢英超，所以拒絕收購。

利辛度馬天尼斯喺阿積士表現大獲好評，報道指曼聯球探曾經多次進行考察，不過結論係佢身型太矮，喺死球好易出事，所以蘇斯克查同蘭歷克不約而同拒絕出手，蘇斯克查更加傾向維拉利爾嘅柏奧托利斯，當然最終都係冇晒下文。直到坦哈格點名一定要簽利辛度馬天尼斯，曼聯先至出到5,500萬鎊天價搶人。

賓福特前鋒艾雲東尼日前表示，佢哋針對利辛度馬天尼斯計劃好成功：「球隊計劃係利用我嘅制空力，尤其我今場對住身型較矮嘅中堅，所以呢個計劃非常成功。老實講馬天尼斯都踢得好有侵略性，見到佢喺半場被換走，對我嚟講都係一個成就。」