坦哈格否認放棄C朗：佢係曼聯領袖！

足球博彩神器，每日重心提供盡在《彩報》：http://win.on.cc/football/　

曼聯喺「雙紅會」反彈擊敗利物浦，棄用C朗拿度同哈利馬古尼嘅效果立竿見影，亦令人憂慮2大球星喺曼聯嘅前景，不過領隊坦哈格賽後否認已放棄C朗，直指佢仍然係隊中領袖之一，相信C朗可以融入自己嘅體系。

C朗今場只係入替踢幾分鐘，被問到今次變陣，坦哈格表示：「我哋有龐大陣容，亦有自己嘅踢法、風格同作戰計劃，我哋只係揀出今場最佳方案，下一場可能又係另一個計劃。」被問到C朗可唔可以融入佢嘅計劃，坦哈格回應：「我覺得佢可以，C朗足球生涯踢過唔同教練、球隊同體系，一樣都交到表現，依家點解唔可以？只要有表現，年齡唔係一個問題。」

坦哈格更指C朗將會係球隊領袖之一：「卡斯米路、華拉尼、C朗拿度都贏過好多錦標，佢哋會引領年輕球員，我希望佢哋嘅出現可以刺激其他球員。轉會窗仲未完，我哋想再引入更多有質素嘅球員。」