荷蘭門將：撲出美斯12碼其實唔難

世盃狂熱盡在《彩報》：https://win.on.cc/football/　

荷蘭同阿根廷將於世界盃8強交鋒，兩隊近2次對賽都踢成0比0，包括2014年世界盃4強，激戰120分鐘互無紀錄，需要互射12碼分勝負，結果阿根廷4射全中勝出晉級。荷蘭門將安達斯諾柏表示已經準備好今仗撲救12碼，並有信心令美斯宴客。

身高2米03嘅安達斯諾柏係荷蘭奇兵，首場分組賽對塞內加爾，先至係佢首次為國家隊上陣，並愈戰愈勇，4場比賽總共面對17次中目標射門，佢救出15次，僅失2球。

來到8強將遇上球王美斯，安達斯諾柏表示並唔擔心：「美斯都係人，同大家一樣，佢都會射失12碼，最緊要係掌握撲救時機。」美斯曾經26次為阿根廷主射12碼，有5次射失，包括今屆分組賽對波蘭一役宴客。

安達斯諾柏認為一旦需要互射12碼，美斯好大機會主射第一輪，只要撲出佢嘅射門，就可以打擊其他阿根廷球員信心，提升荷蘭晉級機會。