史卡朗尼雙喜臨門　當選最佳領隊+續約

足球博彩神器，每日重心提供盡在《彩報》：http://win.on.cc/football/　

阿根廷主帥史卡朗尼雙喜臨門，不但當選國際足協(FIFA)年度最佳領隊，並且落實同阿根廷足總續約至2026年，意味呢位44歲少帥將會領軍出戰下屆世界盃，力爭衞冕。

史卡朗尼2018年年尾坐正阿根廷帥位後，帶隊獲得彪炳戰績，先喺2021年協助阿根廷奪得美洲國家盃冠軍，為國家隊打破28年錦標荒，上年更登上世界盃冠軍寶座，晉身頂級名帥行列，因而獲得唔少大球會垂青。

阿根廷足總同史卡朗尼經過2個月談判後，終於喺國際足協頒獎禮前夕達成續約協議，足總會長泰比話：「我哋同史卡朗尼之間有高度信任，以及良好有效嘅溝通，佢會繼續帶領國家隊。」

隨住史卡朗尼正式續約，消除不明朗因素，可以穩定軍心，為阿根廷出戰2024年美洲國家盃及2026年世界盃，打下一支強心針。