艾納斯補時入3球反勝　C朗空門都唔入

足球博彩神器，每日重心提供盡在《彩報》：http://win.on.cc/football/　

周六(4日)凌晨沙特阿拉伯聯賽出現罕見一幕，有C朗助陣嘅艾納斯大部份時間落後之下，踢到補時連入3球，以3比1奇迹反勝艾巴天。不過，C朗踢足全場，並冇取得入球或者助攻，未知是否受到近日被指「偷食」委內瑞拉網紅Georgilaya嘅性醜聞影響。

C朗早前4場入8球，但今仗腳頭無靈，開賽17分鐘艾納斯失守落後，當全世界以為C朗會扮演救世主，協助球隊踢出逆轉勝時，呢位38歲葡萄牙射手演出反而令人失望，7次射門都無功而還，包括1次錯失射入空門良機，實在尷尬。

戰至補時，艾納斯突然發威，加列比、艾法圖、馬蘭各入1球，反勝3比1。由於艾巴天今仗頻頻拖延時間，球證罕有補時16分鐘，令艾納斯有機會反敗為勝，網民認為係賽會有心幫助C朗贏波，使出「費格遜時間」，補時補到艾納斯勝出為止。

賽後C朗喺社交網上發文感謝隊友冇放棄：「始終相信、一直到最後，加油呀！」