遭離婚打擊　丹尼爾獄中絕食

最強博彩盤路過關神器《串績王》：http://win.on.cc/football/　

巴西國腳丹尼爾上年12月底涉嫌喺巴塞隆拿一間夜店性侵一名女子，自今年1月20日被西班牙警方拘捕之後，一直關押喺監獄。屋漏偏逢連夜雨，丹尼爾妻子Joana Sanz早前提出離婚，根據英國《太陽報》最新爆料，呢位39歲後衞大受打擊，精神崩潰，並喺獄中絕食。

據悉丹尼爾入獄初期，原本仍然保持良好心態，仲同其他在獄人士一齊踢波。不過之後情況急轉直下，老婆Joana Sanz喺3月10日發文，強烈暗示決定離婚：「未來，我將繼續喺你身邊，但會係另一種方式，我結束自2015年開始嘅人生階段，將邁向下一個階段。」

丹尼爾同Joana Sanz喺2015年相識，2年之後結婚，西班牙傳媒指Joana Sanz上月去監獄探丹尼爾，已提出離婚，令呢位球星精神崩潰，甚至拒絕進食。

丹尼爾球員生涯曾經獲得43個重要賽事冠軍，但自從涉嫌性侵被捕後，已被所屬墨西哥球會普馬斯解約，依家再遭老婆拋棄，跌入人生深淵。