巴塞上訴失敗　加維冇得註冊今夏可自由身走人

足球博彩神器，每日重心提供盡在《彩報》：http://win.on.cc/football/　

西班牙《世界體育報》爆料，指巴塞隆拿上訴失敗，西甲賽會維持取消中場加維一隊註冊資格，意味佢上年9月所簽嘅4年合約無效，只能做番青年軍球員，可於今年6月底自由身離隊，巴塞將面臨痛失1位價值1億歐元球員。

現年18歲嘅加維2年前開始為巴塞隆拿一隊上陣，並迅速成為主力，上年9月獲得4年新約。不過，西甲賽會指巴塞隆拿薪酬超出上限，必須取消加維一隊註冊資格，冇得再着6號球衣，因為西甲規定一隊球員需要着1至25號。

加維被取消註冊資格後，今季仍可以用青年軍球員身份為巴塞披甲，可能要着番30號波衫。巴塞上訴失敗，但對今季人腳冇影響，問題係加維被取消註冊後，原本續約後嘅1億歐元毀約金已經無效，根據舊合約，佢可以喺今夏自由身走人。

不過，巴塞仍然可以喺今夏放走部份高薪球員，騰出薪酬空間，再同加維簽約註冊，難怪盛傳巴塞管理層有意將法蘭基迪莊出售畀曼聯。