有情有義！蘭斯達爾捐錢舊隊友做手術

足球博彩神器，每日重心提供盡在《彩報》：http://win.on.cc/football/　

阿仙奴今季喺英超排榜首，門將蘭斯達爾嘅高水平演出大獲好評，呢位英格蘭國腳亦有情有義，近日就捐錢幫一位受重傷嘅前隊友做手術，令佢可以延續足球生涯。

曾經同蘭斯達爾喺錫菲聯、車士打菲特做過隊友嘅迪馬奧，依家只係效力非聯賽球隊Matlock Town，上月佢受到嚴重膝傷需要做手術，但由於喺公立醫療排期需時，可能會影響佢足球生涯，所以迪馬奧就喺網上發起籌款，希望籌6,000鎊(約5.9萬港元)去私家醫院做膝部手術。

蘭斯達爾知道後就捐出1,000鎊(約9,800港元)，令籌款目標順利達成，曾代表愛爾蘭U21出賽嘅迪馬奧表示：「阿仙奴嘅1號出手幫忙，我真係唔知點樣多謝你......」蘭斯達爾就回應：「你值得擁有呢個機會！」