提早慶祝？拿玻里準備獎盃刻馬納當拿名字

足球博彩神器，每日重心提供盡在《彩報》：http://win.on.cc/football/　

拿玻里喺今季意甲一枝獨秀，已經拋離第2位拉素16分，僅剩下9場聯賽，奪冠十拿九穩，會方開始籌備「慶祝活動」，計劃喺聯賽冠軍獎盃刻上名宿馬納當拿嘅名字，紀念呢位已故阿根廷球王。

拿玻里史上僅奪得2次意甲冠軍，包括1986/87年球季、1989/90年球季，當年球隊喺馬納當拿擔大旗之下所向披靡，屬於拿玻里史上最光輝歲月，佢亦成為球迷心目中嘅神人。

相隔33年，拿玻里終於再有機會捧意甲，會方希望可以同呢位球壇傳奇人物分享喜悅，準備接過聯賽冠軍獎盃後，刻上名宿馬納當拿名字。

此外，馬納當拿曾經協助拿玻里奪得1988/89年足協盃(歐霸盃前身)冠軍，亦係球隊史上唯一一次歐洲賽冠軍，拿玻里打入今屆歐聯8強，如果可以一鼓作氣捧盃，成就肯定超越馬納當拿時代。