基沙文創造25球　睇齊羅拔佬

足球博彩神器，每日重心提供盡在《彩報》：http://win.on.cc/football/　

周四(4日)凌晨西甲，馬德里體育會主場以5比1大勝卡迪斯，以1分優勢反超前同市宿敵皇馬，升上第2位，馬體會前鋒基沙文今仗梅開二度，累積創造25個入球，包括入13球及12次助攻，同巴塞隆拿神鋒羅拔利雲度夫斯基，並列為今季西甲創造最多入波嘅球員。

32歲嘅基沙文仍然有心有力，開賽2分鐘就入波，上半場連入2球，換邊之後，艾華路莫拉達、恩歷克卡拉斯高、拿侯爾盧斯路各建一功，其中恩歷克卡拉斯高主射12碼入網，馬體會終於打破連續35場西甲未能獲得12碼嘅走勢。

馬體會近期火力全開，連續2場入5球，近3仗合共轟入13球，主角基沙文繼上仗對華拉度列，貢獻2次助攻之後，今仗射入2球，今季西甲已有13球進帳及12次助攻，換言之累積創造25個入球，追平羅拔利雲度夫斯基(入19球及6次助攻)。

賽後基沙文豪言要成為馬體會史上傳奇球員，希望即使再過好多年之後，球迷仍然會記得佢。