林柏特回巢車路士首勝　網民：護級成功

足球博彩神器，每日重心提供盡在《彩報》：http://win.on.cc/football/　

林柏特重返車路士擔任看守領隊後，終於打破6連敗頹勢，首嘗贏波滋味，喺周六(6日)晚英超以3比1擊敗般尼茅夫。不過，「林伯」幫球隊止血，並未贏得掌聲，反而被傳媒同網民寸，車路士終於護級成功。

「林伯」上月回巢領軍後6戰6敗，今仗取得好開局，車路士開賽9分鐘，由干拿加歷查入波打開紀錄，但般尼茅夫好快靠馬迪亞斯雲拿建功扳平。其後戰局陷入拉鋸，當球迷以為車路士又要失分嘅時候，球隊喺最後8分鐘突然發威，由中堅班洛特巴迪亞舒尼、前鋒祖奧菲歷斯各入1球，全取3分而回，結束9場不勝困局。

比賽過程中，「車迷」對球隊充滿怨氣，林柏特下半場作出調動，換入艾斯派古達、薛耶治時，現場立即出現噓氣，明顯質疑「林伯」部署，此外亦頻頻向班主保利喝倒采，即使車路士贏波後，亦有唔少球迷喺網上發言批評球隊表現。亦有花生友趁機抽水，指車路士已經領先踢多1場嘅尾4球隊列斯聯12分，恭喜車仔護級成功。