普巴翻生做救星　祖記補時7分鐘逼和西維爾

最強博彩盤路過關神器《串績王》：http://win.on.cc/football/　

幾乎被球迷遺忘嘅法國球星保羅普巴，周五(12日)凌晨歐霸盃4強首回合終於翻生，最後關頭送出關鍵助攻，協助祖雲達斯喺補時7分鐘1比1逼和西維爾，下周五(19日)次回合賽事會作客西班牙踢生死戰，爭奪歐霸盃決賽資格。

祖雲達斯今仗雖然主場出擊，但面對「歐霸之王」西維爾明顯被比下去，26分鐘西維爾一次快速反擊，奧甘波斯右路傳中，安尼斯利無人看管下輕鬆射入。祖記下半場變陣略有起色，70分鐘入場嘅保羅普巴表現活躍，終於去到補時7分鐘，保羅普巴底線前頭槌傳中，由另一後備奇兵加迪喺龍門口頂入，追成1比1完場。

30歲嘅保羅普巴上年約滿曼聯後，重返祖記即長期養傷，復出之後連1場正選都未做過，今場就踢出加盟以來代表作，教練阿里基賽後亦點名大讚：「當保羅普巴喺對方半場踢，佢就係最頂尖嘅球員，如果佢嘅狀態良好，我肯定會畀佢打正選，佢可以作出重大貢獻。」