挽留人才　皇馬加碼利誘阿辛斯奧續約

足球博彩神器，每日重心提供盡在《彩報》：http://win.on.cc/football/　

皇馬今夏增兵之前，首要工作係挽留人才，根據西班牙《馬卡報》爆料，「銀河艦隊」正在全力遊說翼鋒馬高阿辛斯奧續約，近日加碼第2次向呢位27歲西班牙國腳開出優厚條件，爭取同佢續約4年。

馬高阿辛斯奧將於今夏約滿，獲得唔少球會垂青，佢亦大踢身價波，今季各項賽事上陣47次射入12球，包括上仗西甲一箭定江山，協助球隊以1比0擊敗基達菲。皇馬曾於3月向阿辛斯奧開出400萬歐元(約3,400萬港元)年薪新合約，但由於只係比現時年薪多50萬歐元，阿辛斯奧並唔滿意，據悉「銀河艦隊」決定加碼至600萬歐元(約5,110萬港元)年薪。

事實上，馬高阿辛斯奧傾向留隊，既然會方今次報價有「誠意」，冇理由再拒絕，預料雙方可望於短期內達成續約協議。

皇馬將於周四(18日)凌晨歐聯4強次回合作客曼城，由於2位前鋒賓施馬、洛迪高高斯有輕傷在身，馬高阿辛斯奧隨時有機會擔任正選，證明自己值得大幅加薪續約。